share
  • facebook
  • facebook-messager
  • whatsapp
  • email

經典可愛女英雄 華麗登陸尖沙咀


原來話咁快就剩返一個禮拜就新年啦!而新年緊接住就係情人節,咁多嘢要慶祝,去邊到先好呀?無乜計劃不如就跟住蘋果優惠周圍去啦!今次我哋走入尖沙咀區,把握新年前嘅機會吸好運,順便幫情人節預習一下,睇下邊到有好嘢食、好嘢睇!想新年有運行,氹另一半開心就睇今期嘅著數情報站啦!

The ONE「飛天少女豬事丁 豬事吉祥遊樂園」

《飛天少女豬事丁》呢套經典動畫絕對係一眾八、九十後嘅集體回憶。擁有水汪汪嘅大眼睛、圓滾滾嘅粉紅色身軀,加上招牌紅披風同蝴蝶結,可以話係「可愛集中體」嘅寶妮今次跳出螢幕,換上春裝、帶埋其他經典角色嚟到尖沙咀The ONE同大家過豬年!

喺呢個豬事吉祥遊樂園入面,正中央當然有人見人愛嘅寶妮啦!寶妮一改女超人形象,化身成一個3.5米高嘅可愛招財豬,頭上裝飾仲有櫻花作點綴,春日感滿分!

遊樂園右側就有「寶妮慢活茶道亭」同埋「布力哥星限定足湯」,喺一片櫻花景緻中寶妮非常識嘆咁品茶賞花,享受慢活之樂;而一旁嘅東仔就坐咗喺足湯旁邊,等緊大家幫佢試試水溫!

現場仲有多個可愛打卡位,如果你係《豬事丁》嘅粉絲,或者想搵返啲童年回憶,記得要來尖沙咀The ONE搵寶妮同埋其他角色影返張相啦!嚟到商場購物仲有特別禮遇,想帶限定禮品返屋企都絕對唔可以錯過!

「飛天少女豬事丁 豬事吉祥遊樂園」詳情

日期:1月20日 至 2月24日

時間:10 am - 10 pm

地點:The ONE UG2中庭及地下露天廣場


發佈日期:
資料最後更新日期為: