share
  • facebook
  • facebook-messager
  • whatsapp
  • email

新年都要落足心機!各商場推出特別版利是封


聖誕節買禮物都要包得靚靚仔仔啦!所以嚟到農曆新年,唔單止禮盒,就連利是封都唔輸人!以往收利是大家都只係注重有無「內涵」,今時今日如果利是封設計都咁正嘅話,收到嘅都特別開心。所以唔少商場都推出別注版利是封,有啲除咗有「樣」之餘居然仲有「香」!

#1 apm x Ashley Percival「Percival個人專屬香氛利是封」

觀塘apm今次個利是封就同英國插畫家Ashley Percival合作推出別注版利是封,大膽風格搭配玩味十足嘅色彩啱晒一班潮人!「潮」嘅位當然唔係只得插畫啦,為咗迎合大眾喜好,apm仲特登加入個人化元素,可以自選香味(兩款味道可揀:玫瑰味/士多啤梨味)同埋自訂名字貼紙!大家只要上網登記預約、登記成為商場會員,成功預約就可以獲得QR code一個,再加當日電子消費嘅收據就可以換到一套八個利是封啦!

換領詳情:2019年1月2日至25日期間到apm網站預約、登記成為apm VIP 會員、再加上當日電子貨幣消費存根即可換領(每日限量100套)。

apm走「潮」嘅路線,新地旗下商場就行「萌」嘅路線!只要大家去到旗下商場—大埔超級城、世貿中心、新太陽廣場、元朗廣場、新翠商場以及新都廣場,消費滿額、加入會員同埋追蹤社交平台就有機會獲得!而呢款「新地潮流金豬利是封」又有咩咁特別呢?除咗見到一隻金豬捧住大吉,祝福大家招財進寶之外,原來仲隨封附送兩款「萌爆金豬造型貼紙」,比大家裝飾利是封上嘅小金豬,幫佢加上趣緻嘅表情,令到可愛度大加分!

換領詳情:2019年1月21日至2月4日期間到指定商場以電子貨幣消費滿$300或以上(最多累積兩張收據),成為新地商場VIP會員或者追蹤商場指定社交媒體即有機會換領。

#3 iSQUARE國際廣場「限量版利是封套裝」

我哋喺尖沙咀介紹咗以懷舊、豬仔錢罌做主題嘅iSQUARE,佢哋都推出咗一套設計感十足嘅限量版利是封!一套五款嘅利是封呼應該「懷舊」呢個主題,以幾何圖案砌出各種香港經典傳統嘅圖案排列,而且仲大玩撞色,富有時代感之餘亦都增添咗時尚感,夠曬有特色!利是封上更寫咗「花開富貴」、「恭喜發財」、「大吉大利」等等嘅祝福詞,內外都咁有「內容」,開心嘅感覺都多一倍!

換領詳情:2019年1月8日起到iSQUARE國際廣場,以電子貨幣消費滿$300或以上(最多累積兩張收據),即有機會換領一套十個利是封。數量有限,換完即止。


發佈日期:
資料最後更新日期為: